कालच्या पावसाची नाही जमली वेचणी
स्वप्नांची झाली छाटणी
वाहून गेला जुंधळा, कांदा कोवळा
थरारल्या साक्षीच्या कातरवेळा
विस्कटल्या तुरी
पानगळल्या बोरी.
फड सैरभैर ऊसाचा
शिग तरंगला कडब्याचा.
पाखरांची शाळा बांधावर
घरट्याचं मढं झाडावर
मोडल्या माना वृक्षांच्या
विझल्या वाती दिव्यांच्या
आता पुन्हा रिती दावण
छळती तिचे जुनेच व्रण.
गोठ्याच्या छताला
आता टांगतो भविष्याला
तरीही पावसाचे या नुठले वळ
काळजाची झाली बाभळ....
- समीर गायकवाड
No comments:
Post a Comment