मला जगायचे आहे ....

मला जगायचे आहे, आई गं ! आई गं SSS !
पंखमिटल्या कळ्यांचे हे बोल कुणी कळवा
आईच्या गर्भातली कैफियत तुम्ही आळवा
लेकींच्या जन्माची ही करुणकथा अनुभवा...
मला जगायचे आहे, आई गं ! आई गं SSS !!..

आईच्या कुशीमध्ये निजायचे आहे,
आजीच्या गोष्टीतही रमायचे आहे..
बाबांच्या मांडीवरती झोपायचे आहे
दादाच्या गालांनाही चुंबायचे आहे.

मला जगायचे आहे, आई गं !! आई गं SSS !!
शाळेतल्या फळयावरती लिहायचे आहे
मैत्रिणींच्या जगामध्ये घुमायचे आहे.
आरशामध्ये पाहुनी नटायचे आहे,
स्पर्धेच्या जगात सिद्ध व्हायचे आहे

मला जगायचे आहे आई गं ! आई गं SSS !!
श्वास माझा अवचित असा, नका हो थांबवू
देहाच्या माझ्या चिंधडया नका हो उडवू !
तुमच्या काळजातुनी मला, नका हो हटवू
मी लेक तुमची रक्ताची, मला नका हो मारू !

मला नका हो मारू मला नका हो मारू SSS !
मला जगायचे आहे आई गं ! आई गं SSS!!

- समीर गायकवाड.

(आईच्या गर्भात खुडल्या गेलेल्या अभागी कळ्यांच्या अधुरया श्वासांना समर्पित..)