द्वैत

आंब्याचा मोहोर देहात, केवड्याचा कहर केसात

विडयाची लाली ओठात, लेवून गंधवस्त्रे अंगात

मोगरी बेटांच्या जोशात, तू येतेस धुंद स्वप्नात !

इश्काच्या गर्द वनात, घेतेस नाग विळख्यात

नशेचे जहर डोळ्यात, दव घर्मबिंदूंचे गजऱ्यात

वीज ओलेत्या केसांत, घाव खोल काळजात !

मरवूनी कैफ कायेत, नेतेस देहाच्या चैत्रबनात

येई लालिमा मृदूगालात, झंकारते वीणा कानात

लीन होतेस वेणूनादात, एक आत्मा दोन देहात !

येती रोमांच अंगात, खणके मृदंग चराचरात

बुडताच तुझ्या डोहात, खोल विकाराच्या अंतात

स्वप्न उतरे सत्यात, द्वैत नुरते मिलनात !

- समीर गायकवाड.